Nationaol Park Drentsche Aa


oudemolensche_diep
Kever_op_een_bloem ©Ter-burg
Loopbrug_Drentsche_Aa © Paardbart


Drentsche Aa: Nationaol Landschap en Nationaol Park

Het stroomgebied van de Drentsche Aa (34.000 bunder) is een zogenuumd Nationaol Landschap. Het hart van het gebied - dat umdebij 10.000 bunder groot is - is ok nog ies Nationaol Park. Dizze dubbele benaoming hef in oes laand gien enkel aander gebied en lat zien wat veur een biezunder gebied dit is. Het Drentsche Aa-gebied is een veulsoortig, old cultuurlandschap dat ontstaon is deurdat landbouw en natuur ieuwenlang naost mekaor bestaon hebt.

Onbeschaodigd stroomdallandschap

‘Drentsche Aa’ is een verzaomelnaom veur al die beekies die zuch oeteindelijk weer saomenvoegd tot ien stroom. Elk diepie hef zien eigen plaotselijke naom. Overal in Nederland bint zowat alle beken en rivierties recht trökken, maor dat geldt niet veur het Drentsche Aa-gebied waor alle waoterdies nog ongesteurd heur ieuwenolde, slingernde weg volgen kunt. De Drentsche Aa is ien van de weerdevolste leeglaandbekkens van Europa.

Het brinkdörpenlandschap

Saomen met het riviertie is ok het olde, karakteristieke brinkdörpenlandschap beholden bleven. Zo’n echt brinkdörp bestiet oet ien of meer brinken met olde ieken en wieder een stuk of wat bochtige weggies, waoran onregelmaotig verspreide historische boerderijen ligt. Dit klassieke dörpsgezicht kuj in Anloo, Taorl, Grol en Elp zien. Op het hogere laand vin ie van oldsheer de mandielige akkers: de essen. In de maolanden bij de beek ligt de gruunlanden. An de akkers en de maolanden langs kuj holtwallen vinden. Vrogger haj dan wiederop oetgestrekte heidevelden, waor nou veural akkers, gruunlaand en bos is.

Gastersche%20Diep
Drents_Landschap_Deurze © Geraldassen
Amerdiep © Gouwenaar

Rieke cultuurgeschiedenis

In het Nationaol Landschap Drentsche Aa bint resten vunden van dörpies die meer as 5.000 jaor old bint. Nargens in Nederland vin ie een gebied met zo’n old arfgoed oet de prehistorie. In Strubben-Kniphorstbos, net even noordelijk van Anloo, ligt twintig hunebedden en hej een hiele koppel prehistorische grafheuvels. Dit is het eerste archeologische reservaat van oes laand. Oet de middeleeuwen kuj nog karrensporen vinden, net as markeringsstienen, oldste saksische boerderijen en de kerken van Anloo en Rolde. Een interessant stuk hedendaogse geschiedenis vertelt de vier grote bosgebieden in het zuden van het Nationaol Landschap. Dizze bossen bint in de crisisjaoren van de veurige ieuw as warkverschaffing op de heidevelden anplant en mussen holt veur de mienen en de industrie levern. Undertussen is dit een geliefd gebied worden veur toeristen en hef het een weerdevolle natuur.

Wandeln en fietsen

Wandelaors en fietsers bint in het Naotionaol Landschap Drentsche Aa prima op heur plek. Der is een oetgebreid netwark an oetgezette wandel- en fietspaoden, maor der bint ok stille padties, die niet bij een bestaonde route heurt. Het gebied is ok geweldig geschikt veur peerdrieden, mountainbiken en nordic walking. De veule wandel- en fietspaoden bint veurzien van routebordties en zie kunt graotis op de smartphone zet worden via de webstee www.annodrenthe.nl. De beste “ingangen” van het gebied bint Tynaorl, Anloo en Raol. Dit bint goeie begunpunten veur een wandel- of fietstocht. Der bint genog parkeerplaotsen (kiek maor op de kaort).

Livvendig bezukersnetwark

Der is in het Drentsche Aa-gebied gien centraal bezukerscentrum, maor wal een zogenuumd livvendig bezukersnetwark dat bestiet oet informaotsiecentrums zunder personeel, informaotsiezuilen op de parkeerplaotsen en informaotsiepunten bij plaotselijke undernimmers as campings, fietsverhuurders, winkels, restaurants, hotels enzowieder. Bij elk informaotsiepunt staot bredties um je te vertellen daj op het goeie stee bint. Je vindt er ok - net as bij de informaotsiecentrums - de ‘Op Stap kraant’ met daorin kaorten en een overzicht van de activiteiten.

carrousel-drentsche-morning-silence-1

Informaotsiecentrum Homanshof Anloo

Dit informaotsiecentrum van Staatsbosbeheer is ien van de ingangen naor het Nationaol Park Drentsche Aa. Je kunt het vinden in een karakteristieke boerderij in de olde kern van Anloo. Der is ok een tentoonstelling en je kunt er een film zien over het landschap van de Drentsche Aa. Het is ok het begunpunt van een stuk of wat oetgezette wandelroutes. Adres: Lunsenhof 20, Anloo. Tillefoon: +31 (0)592-273061. Openingstieden: 1/4 - 31/10: 9.00-17.00 uur; 1/11 - 31/3: 10.00-17.00 uur. Op maondag dicht.